1.
Guihaume, Toni, Pèire,
Jaque, Glaude, Micoulau,
Vous an jamai fa vèire
Lou soulèu que pèr un trau.
Venès vite,
Courrès vite,
Qu’aquesto fes lou veirés tant que voudrés,
Pèr mai de dous o tres.
2.
Dins uno cabaneto
Traucado de tout coustat,
Sènso ges de luneto,
Diéu fai vèire sa clarta.
‖: E sa Maire, :‖
Qu’es auprès d’éu, lou soulèu près de si péu,
Semblarié qu’un calèu !
3.
Quand miejo-nue sounavo,
Soumihave tout escas.
Nostre gros gau cantavo :
« Cacaraca ! Cacaraca ! »
‖: Quaucun crido ! :‖
Jan, lèvo-te ! Gros palet, abiho-te !
Escouto aquest moutet !
4.
Sènso vèire persouno,
Au travers de moun chassis,
Ause l’ange qu’entouno :
« Gloria in excelsis !
‖: Et in terra… » :‖
Tòu ! Patatòu ! Saute au sòu, de moun linçòu,
E courre coume un fòu.
5.
Ai vist, noun vous desplase,
Un enfant dessus lou fen,
Un ome, un biòu, un ase,
A l’entour d’uno jacènt.
‖: Que de joio ! :‖
Dins aquéu liò, fan triò, e pèr ecò
L’ase respond : « Hi ! Ho ! »
6.
Courrès, courrès, bregado !
Anas vèire coume iéu
La Vierge benurado
Qu’alacho leu Fiéu de Diéu.
‖: Faudra dire :‖
Quauco cansoun au Garçoun, a la façoun
D’aquelo de soum-soum.