1.
Tam gdze Wisła òd Krakòwa
W pòlsczé mòrze płinie,
Pòlskô wiara, pòlskô mòwa
Nigdë nie zadżinie.
Chorus:
Nigdë do zgùbë
Nie przińdą Kaszubë,
Marsz, ‖: marsz :‖ za wrodżem!
Më trzëmómë z Bòdżem.
2.
Më z Miemcami wieczë całé
Krwawé wiedlë wòjnë,
Wòlné piesnie wiedno brzmiałë
Bez gòrë i chòjnë.
Chorus
3.
Przëszed Krziżôk w twardi blasze,
Pôlëł wse i miasta,
Za to jegò cepë nasze
Grzmòcëłë lôt dwa sta.
Chorus
4.
Nôs zawòłôł do swi rotë
Pòlsczi król Jadżełło,
Téj w miemiecczéch karkach gnôtë
Trzeszczałë jaż miło.
Chorus
5.
Gdze król Kazmiérz gnôł Krziżôka?
Gnôł gò pòd Chònice!
Bò gò zgnietłë, jak robôka,
Kaszubsczé kłonice.
Chorus
6.
Czej rôz naju òkrãtami
Szwedë najechalë,
Më żesmë jéch kapuzami
Z Pùcka wënëkalë.
Chorus
7.
Krziżem swiãtim przeżegnanié,
Séc, seczera, kòsa,
Z tëm Kaszuba w piekle stanie,
Diôbłu ùtrze nosa.
Chorus
8.
Nasz Stanisłôw Kòstka swiãti,
Co sã ù nôs rodzëł,
Nie dopùscy, bë zawzãti
Wróg nóm długò szkòdzëł.
Chorus
9.
Płaczą matczë nad sënami,
Płaczą dzys dzewice,
Hola, jesz je Bóg nad nami
Dôł cepë, kłonice.
Chorus