1.
Tam gdze Wisła òd Krakòwa
W pòlsczé mòrze płinie,
Pòlskô wiara, pòlskô mòwa
Nigdë nie zadżinie.
Chorus:
Nigdë do zgubë
Nie przińdą Kaszubë,
‖: Marsz, :‖ marsz za wrodżem!
Më trzëmómë z Bòdżem.
2.
Më z Mniemcami wiecze całé
Krwawé wiedlë wòjnë,
Wòlné piesnie wiedno brzmniałë
Bez gòrë i chòjnë.
Chorus
3.
Przëszed Krziżôk w twardi blasze,
Pôlëł wse i mniasta,
Za to jegò cepë nasze
Grzmòcëłë lôt dwa sta.
Chorus
4.
Nôs zawòłôł do swi rotë
Pòlsczi król Jadżełło,
Téj w mniemniecczéch karkach gnôtë
Trzeszczałë jaż mniło.
Chorus
5.
Gdze król Kazmniérz gnôł Krziżôka?
Gnôł gò pòd Chònice!
Bò gò zgnietłë, jak robôka,
Kaszubsczé kłonice.
Chorus
6.
Czej rôz naju òkrãtami
Szwedë najechalë,
Më żesmë jéch kapuzami
Z Pùcka wënëkalë.
Chorus
7.
Krziżem swiãtim przeżegnanié,
Séc, seczera, kòsa,
Z tëm Kaszuba w piekle stanie,
Diôbłu ùtrze nosa.
Chorus
8.
Nasz Stanisłôw Kòstka swiãti,
Co sã ù nôs rodzëł,
Nie dopùscy, bë zawzãti
Wróg nóm długò szkòdzëł.
Chorus
9.
Płaczą matcze nad sënami,
Płaczą dzys dzewice,
Hola, jesz je Bóg nad nami
Dôł cepë, kłonice.
Chorus